Великая вечерня 27.03.2022

На великой вечерне «Блаже́н муж» — кафизма вся.

На «Го́споди, воззва́х» стихиры на 10:

воскресные, глас 7‑й: «Пpииди́те, возpа́дуемся…» — 3,

восточные, глас 7‑й: «А́ще и ят был еси́…» — 3 (на ряду 4 стихиры, 1 из них опускается),

Трiоди (Креста), глас 5‑й: «Возсiя́й Госпо́день…» — 4.

«Слава» — Трiоди (Креста), глас 3‑й: «Христе́ Бо́же на́ш…»,

«И ныне» — догматик, глас 7‑й: «Ма́ти у́бо позна́лася…».

Вход с кадилом. «Свѣ́те ти́хiй». Прокимен — недели, глас 6‑й: «Госпо́дь воцари́ся…» (со стихами: «Облече́ся Госпо́дь…», «И́бо утверди́ вселе́нную…», «До́му Твоему́ подоба́ет…»).

Сугубая ектения: «Рцем вси…».

«Сподо́би, Го́споди». Просительная ектения и молитва главопреклонения.

На литии стихира храма.

«Слава, и ныне» — Трiоди (Креста), глас 5‑й: «Зря́щи тя́ тва́рь…».

На стиховне стихиры:

воскресные, глас 7‑й: «Воскpе́сл еси́ из гpо́ба…»,

ины по алфавиту, глас 7‑й: «Воскpе́сшему из ме́pтвых…».

«Слава, и ныне» — Трiоди (Креста), глас 4‑й: «Пособи́вый Го́споди…».

«Ны́не отпуща́еши…». Трисвятое по «О́тче наш…».

По Трисвятом — тропари:

отпустительный, глас 4‑й: «Богоро́дице Дѣ́во…» (дважды),

Трiоди (Креста), глас 1‑й: «Спаси́ Го́споди лю́ди…».

Діакон: Востаните!
Хор: Господи, благослови!

Iере́й, ста́въ предъ свято́ю трапе́зою съ кади́льницею, зна́менуетъ крестови́днѡ, и возглаша́етъ глаго́ля:

Священник: Слава святѣ́й, и единосу́щнѣй, и животворя́щей, и нераздѣ́льнѣй Тро́ицѣ, всегда́, ны́нѣ и при́снѡ, и во вѣ́ки вѣкѡ́въ.
Аминь.
Священнослужители в алтаре: Прiиди́те, поклони́мся Царе́ви на́шему Бо́гу.
Прiиди́те, поклони́мся и припаде́мъ Хрiсту́, Царе́ви на́шему Бо́гу.
Прiиди́те, поклони́мся и припаде́мъ самому́ Христу́, Царе́ви и Бо́гу на́шему.
Прiиди́те, поклони́мся и припаде́м Ему́.

(Часослов. 2002. С. 147)
Псало́м Дави́ду, о мирсте́м бытии́, 103.
Предстоя́тель, или́ учине́нный чтец (на пра́ктике пое́т хор):
¹Благослови́, душе́ моя́, Го́спода; [Благослове́н еси́, Го́споди.] Го́споди, Бо́же мой, возвели́чился еси́ зело́ [Благослове́н еси́, Го́споди]. Во испове́дание и в велеле́поту обле́клся еси́. ²Одея́йся све́том, я́ко ри́зою, простира́яй не́бо, я́ко ко́жу. ³Покрыва́яй вода́ми превы́спренняя Своя́, полага́яй о́блаки на восхожде́ние Свое́, ходя́й на крилу́ ве́треню. ⁴Творя́й А́нгелы Своя́ ду́хи и слуги́ Своя́ пла́мень о́гненный. ⁵Основа́яй зе́млю на тве́рди ея́, не преклони́тся в век ве́ка. ⁶Бе́здна, я́ко ри́за, одея́ние ея́, на гора́х ста́нут во́ды [Ди́вна дела́ Твоя́, Го́споди]. ⁷От запреще́ния Твоего́ побе́гнут, от гла́са гро́ма Твоего́ убоя́тся. ⁸Восхо́дят го́ры и нисхо́дят поля́ в ме́сто, е́же основа́л еси́ им. ⁹Преде́л положи́л еси́, eго́же не пре́йдут, ниже́ обратя́тся покры́ти зе́млю. ¹⁰Посыла́яй исто́чники в де́брех, посреде́ гор про́йдут во́ды. ¹¹Напая́ют вся зве́ри се́льныя, ждут она́гри в жа́жду свою́. ¹²На ты́х пти́цы небе́сныя привита́ют, от среды́ ка́мения дадя́т глас. ¹³Напая́яй го́ры от превы́спренних Свои́х, от плода́ дел Твои́х насы́тится земля́. ¹⁴Прозяба́яй траву́ ското́м, и злак на слу́жбу челове́ком, извести́ хлеб от земли́. ¹⁵И вино́ весели́т се́рдце челове́ка, ума́стити лице́ еле́ем, и хлеб се́рдце челове́ка укрепи́т. ¹⁶Насы́тятся древа́ польска́я, ке́дри Лива́нстии, и́хже еси́ насади́л. ¹⁷Та́мо пти́цы вогнездя́тся, ероди́ево жили́ще предводи́тельствует и́ми. ¹⁸Го́ры высо́кия еле́нем, ка́мень прибе́жище за́яцем. ¹⁹Сотвори́л есть луну́ во времена́, со́лнце позна́ за́пад свой. ²⁰Положи́л еси́ тму, и бысть нощь, в не́йже про́йдут вси зве́рие дубра́внии; ²¹ски́мни рыка́ющии, восхи́тити и взыска́ти от Бо́га пи́щу себе́. ²²Возсия́ со́лнце, и собра́шася, и в ло́жах свои́х ля́гут. ²³Изы́дет челове́к на де́ло свое́, и на де́лание свое́ до ве́чера. ²⁴Я́ко возвели́чишася дела́ Твоя́, Го́споди, вся прему́дростию сотвори́л еси́: испо́лнися земля́ тва́ри Твоея́. ²⁵Сие́ мо́ре вели́кое и простра́нное: та́мо га́ди, и́хже несть числа́, живо́тная ма́лая с вели́кими. ²⁶Та́мо корабли́ препла́вают, змий сей, eго́же созда́л еси руга́тися eму́. ²⁷Вся к Тебе́ ча́ют, да́ти пи́щу им во бла́го вре́мя. ²⁸Да́вшу Тебе́ им, соберу́т; отве́рзшу Тебе́ ру́ку, вся́ческая испо́лнятся бла́гости. ²⁹Отвра́щшу же Тебе́ лице́, возмяту́тся: отъи́меши дух их, и исче́знут, и в персть свою́ возвратя́тся. ³⁰По́слеши Ду́ха Твоего́, и сози́ждутся, и обнови́ши лице́ земли́. ³¹Бу́ди сла́ва Госпо́дня во ве́ки, возвесели́тся Госпо́дь о де́лех Свои́х. ³²Призира́яй на зе́млю, и творя́й ю́ трясти́ся; прикаса́яйся гора́м, и дымя́тся. ³³Воспою́ Го́сподеви в животе́ мое́м, пою́ Бо́гу моему́, до́ндеже есмь. ³⁴Да услади́тся Ему́ бесе́да моя́, аз же возвеселю́ся о Го́споде. ³⁵Да исче́знут гре́шницы от земли́, и беззако́нницы, я́коже не бы́ти им; благослови́, душе́ моя́, Го́спода [Сла́ва Ти́, Го́споди, сотвори́вшему вся́].
Со́лнце позна́ за́пад свой; положи́л еси́ тьму, и бысть нощь.
Я́ко возвели́чишася дела́ Твоя́, Го́споди, вся прему́дростию сотвори́л еси́.
Сла́ва Ѻтцу́, и Сы́ну, и Свѧто́му Ду́ху, и ны́нѣ и при́снѡ, и во вѣ́ки вѣкѡ́въ. Ами́нь.
Аллилу́їа, аллилу́їа, аллилу́їа, сла́ва Тебѣ̀, Бо́же. (три́жды, с покло́ны)

Моли́тва 1-я.

Свяще́нник: Го́споди ще́дрый и ми́лостивый, долготерпели́ве и многоми́лостиве, внуши́ моли́тву на́шу, и вонми́ гла́су моле́ния на́шего, сотвори́ с на́ми зна́мение во бла́го, наста́ви нас на путь Твой, е́же ходи́ти во и́стине Твое́й, возвесели́ сердца́ на́ша, во е́же боя́тися и́мене Твоего́ свята́го. Зане́ ве́лий еси́ Ты и творя́й чудеса́, Ты еси́ Бог еди́н, и несть подо́бен Тебе́ в бозе́х, Го́споди: си́лен в ми́лости и благ в кре́пости, во е́же помога́ти, и утеша́ти, и спаса́ти вся упова́ющия во и́мя свято́е Твое́.
Я́ко подоба́ет Тебе́ вся́кая сла́ва, честь и поклоне́ние, Ѻтцу́, и Сы́ну, и Свято́му Ду́ху, ны́не и при́сно, и во ве́ки веко́в. Ами́нь.

Моли́тва 2-я.

Го́споди, да не я́ростию Твое́ю обличи́ши нас, ниже́ гне́вом Твои́м нака́жеши нас, но сотвори́ с на́ми по ми́лости Твое́й, врачу́ и исцели́телю душ на́ших. Наста́ви нас ко приста́нищу хоте́ния Твоего́, просвети́ о́чи серде́ц на́ших в позна́ние Твоея́ и́стины; и да́руй нам про́чее настоя́щаго дне ми́рное и безгре́шное, и все вре́мя живота́ на́шего, моли́твами святы́я Богоро́дицы и всех святы́х.
Я́ко Твоя́ держа́ва и Твое́ есть Ца́рство, и си́ла, и сла́ва, Ѻтца́, и Сы́на, и Свята́го Ду́ха, ны́не и при́сно, и во ве́ки веко́в. Ами́нь.

Моли́тва 3-я.

Го́споди Бо́же наш, помяни́ нас, гре́шных и непотре́бных раб Твои́х, внегда́ призыва́ти нам свято́е и́мя Твое́, и не посрами́ нас от ча́яния ми́лости Твоея́, но да́руй нам, Го́споди, вся я́же ко спасе́нию проше́ния, и сподо́би нас люби́ти, и боя́тися Тебе́ от всего́ се́рдца на́шего, и твори́ти во всех во́лю Твою́.
Я́ко благ и человеколю́бец Бог еси́, и Тебе́ сла́ву возсыла́ем, Ѻтцу́, и Сы́ну, и Свято́му Ду́ху, ны́не и при́сно, и во ве́ки веко́в. Ами́нь.

Моли́тва 4-я.

Немо́лчными пе́сньми и непреста́нными славословле́ньми от святы́х Си́л воспева́емый, испо́лни уста́ на́ша хвале́ния Твоего́, е́же пода́ти вели́чествие и́мени Твоему́ свято́му. И да́ждь нам уча́стие и насле́дие со все́ми боя́щимися Тебе́ и́стиною, и храня́щими за́поведи Твоя́, моли́твами святы́я Богоро́дицы и всех святы́х Твои́х.
Я́ко подоба́ет Тебе́ вся́кая сла́ва, честь и поклоне́ние, Ѻтцу́, и Сы́ну, и Свято́му Ду́ху, ны́не и при́сно, и во ве́ки веко́в. Ами́нь.

Моли́тва 5-я.

Го́споди, Го́споди, пречи́стою Твое́ю дла́нию содержа́й вся́ческая, долготерпя́й на всех нас, и ка́яйся о зло́бах на́ших, помяни́ щедро́ты Твоя́, и ми́лость Твою́, посети́ ны Твое́ю бла́гостию и да́ждь нам избежа́ти и про́чее настоя́щаго дне Твое́ю благода́тию от разли́чных ко́зней лука́ваго, и ненаве́тну жизнь на́шу соблюди́ благода́тию всесвята́го Твоего́ Ду́ха.
Ми́лостию и человеколю́бием единоро́днаго Твоего́ Сы́на, с Ни́мже благослове́н еси́, со всесвяты́м, и благи́м, и животворя́щим Твои́м Ду́хом, ны́не и при́сно, и во ве́ки веко́в. Ами́нь.

Моли́тва 6-я.

Бо́же вели́кий и ди́вный, неисповеди́мою бла́гостию и бога́тым про́мыслом управля́яй вся́ческая, и мирска́я нам блага́я дарова́вый, и поручи́вый нам обеща́нное Ца́рство, обеща́нными благи́ми; путесотвори́вый нам и дне преше́дшую ча́сть от вся́каго уклони́тися зла: да́руй нам и про́чее непоро́чно соверши́ти, пред свято́ю сла́вою Твое́ю, пе́ти Тя, Еди́наго блага́го и человеколюби́ваго Бо́га на́шего.
Я́ко Ты еси́ Бог наш, и Тебе́ сла́ву возсыла́ем, Ѻтцу́, и Сы́ну, и Свято́му Ду́ху, ны́не и при́сно, и во ве́ки веко́в. Ами́нь.

Моли́тва 7-я.

Бо́же вели́кий и вы́шний, Еди́н име́яй безсме́ртие, во све́те живы́й непристу́пнем, всю́ тварь прему́дростию созда́вый, раздели́вый между́ све́том и между́ тьмо́ю, и со́лнце положи́вый во о́бласть дне, луну́ же и зве́зды во о́бласть но́щи, сподо́бивый нас, гре́шных, и в настоя́щий ча́с предвари́ти лице́ Твое́ испове́данием, и вече́рнее Тебе́ славосло́вие принести́. Сам, Человеколю́бче, испра́ви моли́тву на́шу я́ко кади́ло пред Тобо́ю, и приими́ ю́ в воню́ благоуха́ния, пода́ждь же нам настоя́щий ве́чер, и приходя́щую но́щь ми́рну, облецы́ ны во ору́жие све́та, изба́ви ны от стра́ха нощна́го и вся́кия ве́щи, во тьме́ преходя́щия, и да́ждь со́н, его́же во упокое́ние не́мощи на́шей дарова́л еси́, вся́каго мечта́ния диа́воля отчужде́нный. Ей Влады́ко, благи́х пода́телю, да и на ло́жах на́ших умиля́ющеся, помина́ем в нощи́ и́мя Твое́, и поуче́нием Твои́х за́поведей просвеща́еми, в ра́дости душе́вней воста́нем ко славосло́вию Твоея́ бла́гости, моле́ния и молитвы Твоему́ благоутро́бию принося́ще, о свои́х согреше́ниих и всех люде́й Твои́х, я́же моли́твами святы́я Богоро́дицы, ми́лостию посети́.
Я́ко благ и человеколю́бец Бог еси́, и Тебе́ сла́ву возсыла́ем, Ѻтцу́, и Сы́ну, и Свято́му Ду́ху, ны́не и при́сно, и во ве́ки веко́в. Ами́нь.
***********

(Служебник. 2003. С. 23)
Дiа́кон: Ми́ром Го́споду помо́лимся.
Хор: Го́споди, поми́луй.
О свы́шнем ми́ре и спасе́нии душ на́ших, Го́споду помо́лимся.
Го́споди, поми́луй.
О ми́ре всего́ мíра, благостоя́нии Святы́х Бо́жиих Церкве́й и соедине́нии всех, Го́споду помо́лимся.
Го́споди, поми́луй.
О святе́м хра́ме сем, и с ве́рою, благогове́нием и стра́хом Бо́жиим входя́щих в о́нь, Го́споду помо́лимся.
Го́споди, поми́луй.
О вели́ком Господи́не и Отце́ на́шем Святе́йшем Патриа́рсе Кирíлле, и о Господи́не на́шем высокопреѡсвяще́ннѣйшем митрополи́те [или́ архїепи́скопѣ, или́ преѡсвяще́ннѣйшемъ епи́скопѣ] и́мярек, честне́м пресви́терстве, вo Христе́ диа́констве, о всем при́чте и лю́дех, Го́споду помо́лимся.
Го́споди, поми́луй.
О Богохрани́мей стране́ на́шей, власте́х и во́инстве ея́, Го́споду помо́лимся.
Го́споди, поми́луй.
О гра́де сем (или́ о ве́си сей, или́ о святе́й оби́тели се́й), вся́ком гра́де, стране́ и ве́рою живу́щих в ни́х, Го́споду помо́лимся.
Го́споди, поми́луй.
О благорастворе́нии возду́хов, о изоби́лии плодо́в земны́х и вре́менех ми́рных, Го́споду помо́лимся.
Го́споди, поми́луй.
О пла́вающих, путеше́ствующих, неду́гующих, стра́ждущих, плене́нных и о спасе́нии и́х, Го́споду помо́лимся.
Го́споди, поми́луй.
О изба́витися нам от вся́кия ско́рби, гне́ва и ну́жды, Го́споду помо́лимся.
Го́споди, поми́луй.
Заступи́, спаси́, поми́луй и сохрани́ нас, Бо́же, Твое́ю благода́тию.
Го́споди, поми́луй.
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Приснодѣ́ву Мари́ю со все́ми святы́ми помяну́вше, са́ми себе́, и дру́г дру́га, и ве́сь живо́т на́ш Христу́ Бо́гу предади́м.
Тебе́, Го́споди.
Возгла́съ: Я́кѡ подоба́етъ Тебѣ̀ вся́кая сла́ва, че́сть и поклоне́нiе, Ѻтцу́ и Сы́ну и Свято́му Ду́ху, ны́нѣ и при́снѡ, и во вѣ́ки вѣкѡ́въ.
Ами́нь.

• 1‑й антїфѡ́нъ, гла́съ 8‑й

  Псало́м Дави́ду, не надпи́сан у евре́й, 1.
  1Блаже́н му́ж, и́же не и́де на сове́т нечести́вых [Аллилу́иа, аллилу́иа, аллилу́иа] и на пути́ гре́шных не ста, и на седа́лищи губи́телей не се́де, 2но в зако́не Госпо́дни во́ля eго́, и в зако́не Его́ поучи́тся день и нощь. 3И бу́дет я́ко дре́во насажде́нное при исхо́дищих вод, е́же плод свой даст во вре́мя свое́, и лист eго́ не отпаде́т, и вся, ели́ка а́ще твори́т, успе́ет. 4Не та́ко нечести́вии, не та́ко, но я́ко прах, eго́же возмета́ет ветр от лица́ земли́. 5Сего́ ра́ди не воскре́снут нечести́вии на суд, ниже́ гре́шницы в сове́т пра́ведных. 6Я́ко весть Госпо́дь путь пра́ведных, и путь нечести́вых поги́бнет [Аллилу́иа, аллилу́иа, аллилу́иа].Псало́м Дави́ду, 2.1Вску́ю шата́шася язы́цы, и лю́дие поучи́шася тще́тным? 2Предста́ша ца́рие зе́мстии, и кня́зи собра́шася вку́пе на Го́спода и на Христа́ Его́. 3Расто́ргнем у́зы их и отве́ржем от нас и́го их. 4Живы́й на Небесе́х посмее́тся им, и Госпо́дь поруга́ется им. 5Тогда́ возглаго́лет к ним гне́вом свои́м и я́ростию Свое́ю смяте́т я́. 6Аз же поста́влен есмь Царь от Него́ над Сио́ном, горо́ю свято́ю Его́, 7возвеща́яй повеле́ние Госпо́дне. Госпо́дь рече́ ко Мне: Сын Мой еси́ Ты, Аз днесь роди́х Тя. 8Проси́ от Мене́, и дам Ти язы́ки достоя́ние Твое́, и одержа́ние Твое́ концы́ земли́. 9Упасе́ши я́ жезло́м желе́зным, я́ко сосу́ды скуде́льничи сокруши́ши я́. 10И ны́не, ца́рие, разуме́йте, накажи́теся вси судя́щии земли́. 11Рабо́тайте Го́сподеви со стра́хом и ра́дуйтеся Ему́ с тре́петом [Аллилу́иа, аллилу́иа, аллилу́иа]. 12Приими́те наказа́ние, да не когда́ прогне́вается Госпо́дь и поги́бнете от пути́ пра́веднаго, егда́ возгори́тся вско́ре я́рость Его́. Блаже́ни вси наде́ющиися Нань [Аллилу́иа, аллилу́иа, аллилу́иа].¹Псало́м Дави́ду, внегда́ отбега́ше от лица́ Авессало́ма, сы́на своего́, 3.2Го́споди, что ся умно́жиша стужа́ющии ми́? 3Мно́зи востаю́т на мя, мно́зи глаго́лют души́ мое́й: несть спасе́ния eму́ в Бо́зе eго́. 4Ты же, Го́споди, Засту́пник мой еси́, сла́ва моя́ и вознося́й главу́ мою́. 5Гла́сом мои́м ко Го́споду воззва́х, и услы́ша мя́ от горы́ святы́я Своея́. 6Аз усну́х, и спах, воста́х, я́ко Госпо́дь засту́пит мя́. 7Не убою́ся от тем люде́й, о́крест напа́дающих на мя. 8Воскресни́, Го́споди, спаси́ мя́, Бо́же мой [Аллилу́иа, аллилу́иа, аллилу́иа], я́ко Ты порази́л еси́ вся вражду́ющыя ми всу́е: зу́бы гре́шников сокруши́л еси́. 9Госпо́дне есть спасе́ние, и на лю́дех Твои́х благослове́ние Твое́ [Аллилу́иа, аллилу́иа, аллилу́иа].
  Сла́ва:
  Сла́ва Ѻтцу́, и Сы́ну, и Свѧто́му Ду́ху, и ны́нѣ и при́снѡ, и во вѣ́ки вѣкѡ́въ. Ами́нь.
  Аллилу́їа, аллилу́їа, аллилу́їа, сла́ва Тебѣ̀, Бо́же. (три́жды, с покло́ны)

• Ектенїѧ̀ ма́лаѧ

  (Служебник. 2003. С. 26)

  Діа́кон: Па́ки и па́ки ми́ромъ Го́споду помо́лимся.

  Хор: Го́споди, поми́луй.

  Заступи́, спаси́, поми́луй и сохрани́ на́съ, Бо́же, Твое́ю благода́тiю.

  Го́споди, поми́луй.

  Пресвяту́ю, пречи́стую, преблагослове́нную, сла́вную Влады́чицу на́шу Богоро́дицу и Приснодѣ́ву Марíю, со всѣ́ми святы́ми помяну́вше, са́ми себе́, и дру́гъ дру́га, и ве́сь живо́тъ на́шъ Христу́ Бо́гу предади́мъ.

  Тебѣ́, Го́споди.

  Возгла́съ: Я́кѡ Твоя́ держа́ва, и Твое́ е́сть Ца́рство, и си́ла, и сла́ва, Ѻтца́ и Сы́на и Свята́гѡ Ду́ха, ны́нѣ и при́снѡ, и во вѣ́ки вѣкѡ́въ.

  Ами́нь.

• 2‑й антїфѡ́нъ, гла́съ 7‑й

  1В коне́ц, в пе́снех псало́м Дави́ду, 4.

  2Внегда́ призва́ти ми́, услы́ша мя́ Бог пра́вды моея́, в ско́рби распространи́л мя́ еси́, уще́дри мя́ и услы́ши моли́тву мою́. 3 Сы́нове челове́честiи, доко́ле тяжкосе́рдiи? Вску́ю лю́бите суету́ и и́щете лжи? 4 И уве́дите, я́ко удиви́ Госпо́дь преподо́бнаго Своего́: Госпо́дь услы́шит мя́, внегда́ воззва́ти ми́ к Нему́. 5 Гне́вайтеся, и не согреша́йте, я́же глаго́лете в сердца́х ва́ших, на ло́жах ва́ших умили́теся. 6 Пожри́те же́ртву пра́вды и упова́йте на Го́спода. 7 Мно́зи глаго́лют: кто яви́т нам блага́я? Зна́менася на нас свет лица́ Твоего́, Го́споди. 8 Дал еси́ весе́лiе в се́рдце мое́м: от плода́ пшени́цы, вина́ и еле́я своего́ умно́жишася. 9 В ми́ре вку́пе усну́ и почíю, я́ко Ты́, Го́споди, еди́наго на упова́нiи всели́л мя́ еси́.

  1О насле́дствующем, псало́м Дави́ду, 5.

  2Глаго́лы моя́ внуши́, Го́споди, разуме́й зва́ние мое́. 3 Вонми́ гла́су моле́ния моего́, Царю́ мой и Бо́же мой, я́ко к Тебе́ помолю́ся, Го́споди. 4 Зау́тра услы́ши глас мой, зау́тра предста́ну Ти, и у́зриши мя. 5 Я́ко Бог не хотя́й беззако́ния, Ты еси́: не присели́тся к Тебе́ лука́внуяй 6 ниже́ пребу́дут беззако́нницы пред очи́ма Твои́ма: возненави́дел еси́ вся де́лающыя беззако́ние. 7 Погуби́ши вся глаго́лющыя лжу: му́жа крове́й и льсти́ва гнуша́ется Госпо́дь. 8 Аз же мно́жеством ми́лости Твоея́, вни́ду в дом Твой, поклоню́ся ко хра́му свято́му Твоему́, в стра́се Твое́м. 9 Го́споди, наста́ви мя пра́вдою Твое́ю, враг мои́х ра́ди испра́ви пред Тобо́ю путь мой. 10 Я́ко несть во усте́х их и́стины, се́рдце их су́етно, гроб отве́рст горта́нь их: язы́ки свои́ми льща́ху. 11 Суди́ им, Бо́же, да отпаду́т от мы́слей свои́х, по мно́жеству нече́стия их изри́ни я́, я́ко преогорчи́ша Тя, Го́споди. 12 И да возвеселя́тся вси упова́ющии на Тя, во век возра́дуются, и всели́шися в них, и похва́лятся о Тебе́ лю́бящии и́мя Твое́. 13 Я́ко Ты благослови́ши пра́ведника, Го́споди: я́ко ору́жием благоволе́ния венча́л еси́ нас.

  1В коне́ц, в пе́снех о осмо́м, псало́м Дави́ду, 6.

  2Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́. 3 Поми́луй мя, Го́споди, я́ко не́мощен есмь, исцели́ мя, Го́споди, я́ко смято́шася ко́сти моя́. 4 И душа́ моя́ смяте́ся зело́: и Ты, Го́споди, доко́ле? 5 Обрати́ся, Го́споди, изба́ви ду́шу мою́: спаси́ мя ра́ди ми́лости Твоея́. 6 Я́ко несть в сме́рти помина́яй Тебе́: во а́де же кто испове́стся Тебе́? 7 Утруди́хся воздыха́нием мои́м, измы́ю на вся́ку нощь ло́же мое́, слеза́ми мои́ми посте́лю мою́ омочу́. 8 Смяте́ся от я́рости о́ко мое́, обетша́х во всех вразе́х мои́х. 9 Отступи́те от мене́, вси де́лающии беззако́ние, я́ко услы́ша Госпо́дь глас пла́ча моего́: 10 услы́ша Госпо́дь моле́ние мое́, Госпо́дь моли́тву мою́ прия́т. 11 Да постыдя́тся и смяту́тся вси врази́ мои́, да возвратя́тся и устыдя́тся зело́ вско́ре.

  Сла́ва:

  Сла́ва Ѻтцу́, и Сы́ну, и Свѧто́му Ду́ху, и ны́нѣ и при́снѡ, и во вѣ́ки вѣкѡ́въ. Ами́нь.

  Аллилу́їа, аллилу́їа, аллилу́їа, сла́ва Тебѣ̀, Бо́же. (три́жды, с покло́ны)

• Ектенїѧ̀ ма́лаѧ

  Діа́кон: Па́ки и па́ки ми́ромъ Го́споду помо́лимся.

  Хор: Го́споди, поми́луй.

  Заступи́, спаси́, поми́луй и сохрани́ на́съ, Бо́же, Твое́ю благода́тiю.

  Го́споди, поми́луй.

  Пресвяту́ю, пречи́стую, преблагослове́нную, сла́вную Влады́чицу на́шу Богоро́дицу и Приснодѣ́ву Марíю, со всѣ́ми святы́ми помяну́вше, са́ми себе́, и дру́гъ дру́га, и ве́сь живо́тъ на́шъ Христу́ Бо́гу предади́мъ.

  Тебѣ́, Го́споди.

  Возгла́съ: Я́кѡ благъ и человѣколю́бецъ Богъ еси́, и Тебѣ̀ сла́ву возсыла́емъ, Ѻтцу́ и Сы́ну и Свято́му Ду́ху, ны́нѣ и при́снѡ, и во вѣ́ки вѣкѡ́въ.

  Ами́нь.

• 3‑й антїфѡ́нъ, гла́съ 7‑й

  1Псало́м Дави́ду, его́же воспе́т Го́сподеви о словесе́х Хуси́евых, сы́на Иемени́ина, 7.

  2Го́споди Бо́же мой, на Тя упова́х, спаси́ мя от всех гоня́щих мя и изба́ви мя: 3 да не когда́ похи́тит я́ко лев ду́шу мою́, не су́щу избавля́ющу, ниже́ спаса́ющу. 4 Го́споди Бо́же мой, а́ще сотвори́х сие́, а́ще есть непра́вда в руку́ мое́ю 5 а́ще возда́х воздаю́щым ми зла, да отпаду́ у́бо от враг мои́х тощ. 6 Да пожене́т у́бо враг ду́шу мою́ и да пости́гнет, и попере́т в зе́млю живо́т мой, и сла́ву мою́ в персть всели́т. 7 Воскресни́, Го́споди, гне́вом Твои́м, вознеси́ся в конца́х враг Твои́х, и воста́ни, Го́споди Бо́же мой, повеле́нием, и́мже запове́дал еси́. 8 И сонм люде́й обы́дет Тя, и о том на высоту́ обрати́ся. 9 Госпо́дь су́дит лю́дем: суди́ ми, Го́споди, по пра́вде мое́й, и по незло́бе мое́й на мя. 10 Да сконча́ется зло́ба гре́шных, и испра́виши пра́веднаго, испыта́яй сердца́ и утро́бы, Бо́же, пра́ведно. 11 По́мощь моя́ от Бо́га, спаса́ющаго пра́выя се́рдцем. 12 Бог суди́тель пра́веден и кре́пок, и долготерпели́в, и не гнев наводя́й на всяк день. 13 А́ще не обратите́ся, ору́жие Свое́ очи́стит, лук Свой напряже́ и угото́ва и́ 14 и в нем угото́ва сосу́ды сме́ртныя, стре́лы Своя́ сгара́емым соде́ла. 15 Се боле́ непра́вдою, зача́т боле́знь, и роди́ беззако́ние: 16 ров изры́, и ископа́ и́, и паде́т в я́му, ю́же соде́ла. 17 Обрати́тся боле́знь eго́ на главу́ eго́, и на верх eго́ непра́вда eго́ сни́дет. 18 Испове́мся Го́сподеви по пра́вде Его́ и пою́ и́мени Го́спода Вы́шняго.

  1В коне́ц, о точи́лех, псало́м Дави́ду, 8.

  2Го́споди, Госпо́дь наш, я́ко чу́дно и́мя Твое́ по всей земли́, я́ко взя́тся великоле́пие Твое́ превы́ше небе́с. 3 Из уст младе́нец и ссу́щих соверши́л еси́ хвалу́, враг Твои́х ра́ди, е́же разруши́ти врага́ и ме́стника. 4 Я́ко узрю́ небеса́, дела́ перст Твои́х, луну́ и зве́зды, я́же Ты основа́л еси́. 5 Что есть челове́к, я́ко по́мниши eго́? или́ сын челове́чь, я́ко посеща́еши eго́? 6 Ума́лил еси́ eго́ ма́лым чим от а́нгел, сла́вою и че́стию венча́л еси́ eго́. 7 И поста́вил еси́ eго́ над де́лы руку́ Твое́ю, вся покори́л еси́ под но́зе eго́. 8 О́вцы и волы́ вся, еще́ же и скоты́ польски́я 9 пти́цы небе́сныя, и ры́бы морски́я, преходя́щыя стези́ морски́я. 10 Го́споди, Госпо́дь наш, я́ко чу́дно и́мя Твое́ по всей земли́.

  Сла́ва:

  Сла́ва Ѻтцу́, и Сы́ну, и Свѧто́му Ду́ху, и ны́нѣ и при́снѡ, и во вѣ́ки вѣкѡ́въ. Ами́нь.

  Аллилу́їа, аллилу́їа, аллилу́їа, сла́ва Тебѣ̀, Бо́же. (три́жды, с покло́ны)

(Служебник. 2003. С. 26)

Діа́кон: Па́ки и па́ки ми́ромъ Го́споду помо́лимся.

Хор: Го́споди, поми́луй.

Заступи́, спаси́, поми́луй и сохрани́ на́съ, Бо́же, Твое́ю благода́тiю.

Го́споди, поми́луй.

Пресвяту́ю, пречи́стую, преблагослове́нную, сла́вную Влады́чицу на́шу Богоро́дицу и Приснодѣ́ву Марíю, со всѣ́ми святы́ми помяну́вше, са́ми себе́, и дру́гъ дру́га, и ве́сь живо́тъ на́шъ Христу́ Бо́гу предади́мъ.

Тебѣ́, Го́споди.

Возгла́съ: Я́кѡ Твоя́ держа́ва, и Твое́ е́сть Ца́рство, и си́ла, и сла́ва, Ѻтца́ и Сы́на и Свята́гѡ Ду́ха, ны́нѣ и при́снѡ, и во вѣ́ки вѣкѡ́въ.

Ами́нь.

Воскре́сны, гла́съ 7‑й. Творе́нiе Іоа́нна Дамаски́на:

(Октоих, гласы 5–8. 1981. С. 317)

Стíхъ, на 10: Изведи́ из темни́цы ду́шу мою́, / испове́датися и́мени Твоему́.

Пpииди́те, возpа́дуемся Го́сподеви, / сокpуши́вшему сме́pти деpжа́ву, / и пpосвети́вшему челове́ческий pод, / со Безпло́тными зову́ще: // Соде́телю и Спа́се наш, сла́ва Тебе́.

Стíхъ: Мене́ ждут пра́ведницы, / до́ндеже возда́си мне.

Кpест пpетеpпе́л еси́ Спа́се, / и погpебе́ние нас pа́ди, / сме́pтию же я́ко Бог смеpть умеpтви́л еси́. / Те́мже покланя́емся тpидне́вному воскpесе́нию Твоему́: // Го́споди, сла́ва Тебе́.

Стíхъ, на 8: Из глубины́ воззва́х к Тебе́, Го́споди, / Го́споди, услы́ши глас мой.

Апо́столи ви́девше воскpесе́ние Соде́теля, чудя́хуся, / пою́ще хвалу́ А́нгельскую: / сия́ сла́ва есть цеpко́вная, / сие́ бога́тство Ца́pствия: // постpада́вый нас pа́ди, Го́споди, сла́ва Тебе́.

И́ны стiхи́ры анато́лiевы, гла́съ 7‑й: (Октоих, гласы 5–8. 1981. С. 317)

Стíхъ: Да бу́дут у́ши Твои́ / вне́млюще гла́су моле́ния моего́.

А́ще и ят был еси́ Хpисте́, от беззако́нных муже́й, / но Ты ми еси́ Бог, и не постыжду́ся; / бие́н был еси́ по плеще́ма, не отмета́юся; / на Кpесте́ пpигвожде́н был еси́, и не таю́; / воста́нием Твои́м хвалю́ся: / смеpть бо Твоя́ живо́т мой, // Всеси́льне и Человеколю́бче Го́споди, сла́ва Тебе́.

Стíхъ, на 6: А́ще беззако́ния на́зриши, Го́споди, Го́споди, кто постои́т? / Я́ко у Тебе́ очище́ние есть.

Дави́дское пpоpо́чество исполня́я Хpисто́с, / вели́чествие в Сио́не Свое́ ученико́м откpы́л есть, / хвали́ма показу́я Себе́, / и сла́вима пpи́сно со Отце́м же и Ду́хом Святы́м: / пе́pвее у́бо безпло́тна, я́ко Сло́ва, / последи́ же нас pа́ди воплоще́на, / и умеpщвле́на я́ко челове́ка, и воскpе́сша со вла́стию, // я́ко Человеколю́бца.

Стíхъ: И́мене ра́ди Твоего́ потерпе́х Тя́, Го́споди, потерпе́ душа́ моя́ в сло́во Твое́, / упова́ душа́ моя́ на Го́спода.

Соше́л еси́ во ад Хpисте́, я́коже восхоте́л еси́: / испpове́pгл еси́ смеpть, я́ко Бог и Влады́ка: / и воскpе́сл еси́ тpидне́вен, / совоскpеси́в Ада́ма от а́довых уз и тле́ния, / зову́ща и глаго́люща: / сла́ва Воскpесе́нию Твоему́, // Еди́не Человеколю́бче.

Трiо́ди (Креста́), гла́съ 5‑й.
Подо́бенъ: Ра́дуйся по́стников: (Трiодь постная. Ч. 1. 2002. Л. 224 об.)

Стíхъ, на 4: От стра́жи у́тренния до но́щи, от стра́жи у́тренния / да упова́ет Изра́иль на Го́спода.

Возсiя́й Госпо́день Кре́сте, свѣтолу́чныя мо́лнiя твоея́ благода́ти, в сердца́ чту́щих тя́, и богопрiя́тною любо́вiю прiе́млющих, мiровожделѣ́нне, и́мже сле́зное потреби́ся сѣ́тованiе, и сме́ртных сѣ́тей изба́вихомся, и к при́сному весе́лiю прiидо́хом. покажи́ красоты́ твоея́ благолѣ́пiе, воздая́нiе пода́ждь воздержа́нiя рабо́м твои́м, вѣ́рно прося́щым твое́ бога́тное заступле́нiе, и ве́лiю ми́лость.

Стíхъ: Я́ко у Го́спода ми́лость, и мно́гое у Него́ избавле́ние, / и Той изба́вит Изра́иля от всех беззако́ний eго́.

Ра́дуйся живоно́сный Кре́сте, Це́ркве кра́сный раю́, дре́во нетлѣ́нiя, прозя́бшее на́м вѣ́чныя сла́вы наслажде́нiе: и́мже бѣсо́встiи отгоня́ются полцы́, и а́нгельстiи свеселя́тся чи́нове, и совокупле́нiя вѣ́рных пра́зднуют. ору́жiе непобѣди́мое, утвержде́нiе неруши́мое, вѣ́рных побѣ́до, свяще́нников похвало́, Христо́вы ны́нѣ стра́сти и на́м пода́ждь дости́гнути, и ве́лiю ми́лость.

Стíхъ: Хвали́те Го́спода вси язы́цы, / похвали́те Его́ вси лю́дие,

Ра́дуйся живоно́сный Кре́сте, благоче́стiя непобѣди́мая побѣ́да, две́рь ра́йская, вѣ́рных утвержде́нiе, Це́ркве огражде́нiе: и́мже тля́ разори́ся и упраздни́ся, и попра́ся сме́ртная держа́ва, и вознесо́хомся от земли́ к небе́сным: ору́жiе непобѣди́мое, бѣсо́в сопротивобо́рче, сла́во му́чеников, преподо́бных я́ко вои́стинну удобре́нiе, приста́нище спасе́нiя, да́руяй мíру ве́лiю ми́лость.

Стíхъ: Я́ко утверди́ся ми́лость Его́ на нас, / и и́стина Госпо́дня пребыва́ет во век.

Гряди́ первозда́нная дво́ице, ли́ка отпа́дшая го́рних, за́вистiю человѣкоубíйцы, го́рькою сла́стiю дре́ва, дре́вле вкуше́нiем. се́ всечестно́е вои́стинну дре́во предгряде́т, к нему́же прите́кше ра́достiю облобыза́йте, и возопíйте к нему́ с вѣ́рою: ты́ на́ше воззва́нiе, Кре́сте всечестны́й, дре́во богоблаже́нное, са́де небе́сный: его́же плода́ причасти́вшеся, нетлѣ́нiе улучи́хом, еде́ма пе́рваго прiе́мше извѣ́стно, и ве́лiю ми́лость.

Сла́ва, Трiо́ди (Креста́), гла́съ 3‑й: (Трiодь постная. Ч. 1. 2002. Л. 225)

Сла́ва Отцу́, и Сы́ну, и свято́му Ду́ху.

Христе́ Бо́же на́ш, во́льное распя́тiе во о́бщее воскресе́нiе ро́да человѣ́ческаго воспрiе́мый, и тро́стiю Креста́, обагре́нiем червле́ным своя́ пе́рсты окровави́вый, оста́вительная на́м ца́рски подписа́ти человѣколю́бствовавый, не пре́зри на́с бѣ́дствующих, и па́ки от тебе́ разстоя́нiе: но уще́дри еди́не долготерпѣли́ве, во обстоя́нiи лю́ди твоя́, и воста́ни, побори́ борю́щыя ны́, я́ко всеси́лен.

И ны́нѣ, Богоро́диченъ, гла́съ 7‑й: (Октоих, гласы 5–8. 1981. С. 319)

И ны́нѣ, и при́сно, и во вѣ́ки вѣко́въ. Ами́нь.

Ма́ти у́бо позна́лася еси́, па́че естества́, Богоpо́дице, / пpебыла́ же еси́ Дѣ́ва, па́че сло́ва и pа́зума: / и чудесе́ Рождества́ Твоего́ сказа́ти язы́к не мо́жет. / Пpесла́вну бо су́щу зача́тию Чи́стая, / непости́жен есть о́бpаз pожде́ния: / иде́же бо хо́щет Бог, побежда́ется естества́ чин. / Те́мже Тя вси, Ма́теpь Бо́жию ве́дуще, / мо́лим Ти ся пpиле́жно, // моли́ спасти́ся душа́м на́шим.

(Служебник. 2003. С. 27)

Диакон: Го́споду помо́лимся.

Свяще́нник же глаго́лет та́йно моли́тву вхо́да:

Ве́чер, и зау́тра, и полу́дне, хва́лим, благослови́м, благодари́м и мо́лимся Тебе́, Влады́ко всех: испра́ви моли́тву на́шу, я́ко кади́ло пред Тобо́ю, и не уклони́ серде́ц на́ших в словеса́ или́ в помышле́ния лука́вствия, но изба́ви нас от всех ловя́щих ду́ши на́ша, я́ко к Тебе́, Го́споди, Го́споди, о́чи наши, и на Тя́ упова́хом, да не посрами́ши нас, Бо́же наш.

Я́кѡ подоба́етъ Тебѣ̀ всѧ́каѧ сла́ва, че́сть и поклоне́нїе, Ѻтцу̀ и Сы́ну и Свѧто́му Ду́ху, ны́нѣ и при́снѡ, и во вѣ́ки вѣкѡ́въ. Ами́нь.

Благослови́, влады́ко, святы́й вхо́д.

И священник благословляет к востоку, глаголя:

Благослове́н вхо́д святы́х Твои́х, Го́споди, всегда́ ны́не и при́сно, и во ве́ки веко́в. Ами́нь.

И возглашает диакон: Прему́дрость, про́сти.

Творе́нiе Софро́нiя, патрiа́рха Iерусали́мскаго: (Часослов. 2002. С. 156)

Свѣ́те ти́хiй святы́я сла́вы, / безсме́ртнаго Ѻтца́ небе́снаго, / свята́го блаже́ннаго, Iису́се Христе́; / прише́дше на за́пад со́лнца, / ви́дѣвше свѣт вече́рнiй, / пое́м Ѻтца́, Сы́на, и Свята́го Ду́ха, Бо́га. / Досто́ин еси́ во вся времена́ / пѣ́т бы́ти гла́сы преподо́бными, / Сы́не Бо́жiй, живо́т дая́й, // тѣ́мже мiр Тя́ сла́вит.

Диакон:

Во́нмемъ.

Священник:

Ми́ръ все́мъ.

Лю́дїе: И ду́хови твоему́.

Прему́дрость, во́нмемъ.

В суббо́ту ве́чера (Пс 92. 1, 5), гла́съ 6‑й: (Часослов. 2002. С. 159)

Канонарх:

Проки́менъ, гла́съ 6‑й:

Госпо́дь воцари́ся, / в ле́поту облече́ся.

Хор:

Госпо́дь воцари́ся, / в ле́поту облече́ся.

Стíхъ: Облече́ся Госпо́дь в си́лу и препоя́сася

Госпо́дь воцари́ся, / в ле́поту облече́ся.

Стíхъ: И́бо утверди́ вселе́нную, я́же не подви́жится.

Госпо́дь воцари́ся, / в ле́поту облече́ся.

Стíхъ: До́му Твоему́ подоба́ет святы́ня, Го́споди, в долготу́ дний.

Госпо́дь воцари́ся, / в ле́поту облече́ся.

Госпо́дь воцари́ся,

в ле́поту облече́ся.

(Служебник. 2003. С. 30)

Дiа́кон: Рцем вси от всея́ души́, и от всего́ помышле́нiя на́шего рце́м.

Хор: Го́споди, поми́луй.

Го́споди Вседержи́телю, Бо́же оте́ц на́ших, мо́лим Ти ся, услы́ши и поми́луй.

Го́споди, поми́луй.

Поми́луй нас, Бо́же, по вели́цей ми́лости Твое́й, мо́лим Ти ся, услы́ши и поми́луй.

Го́споди, поми́луй. (три́жды)

Еще́ мо́лимся о Вели́ком Господи́не и отце́ на́шем Святе́йшем Патриа́рсе Кирíлле, и о господи́не на́шем высокопреѡсвяще́ннѣйшем митрополи́те [или́ архїепи́скопѣ, или́ преѡсвяще́ннѣйшемъ епи́скопѣ] и́мярек, и о все́й во Христе́ бра́тии на́шей.

Го́споди, поми́луй. (три́жды)

Еще́ мо́лимся о богохрани́мей стране́ на́шей, власте́х и во́инстве ея́, да ти́хое и безмо́лвное житие́ поживе́м во вся́ком благоче́стии и чистоте́.

Го́споди, поми́луй. (три́жды)

Еще́ мо́лимся о блаже́нных и приснопа́мятных созда́телех свята́го хра́ма сего́ (аще во обители: святы́я оби́тели сея́), и о все́х преждепочи́вших отце́х и бра́тиях, зде́ лежа́щих и повсю́ду, правосла́вных.

Го́споди, поми́луй. (три́жды)

Еще́ мо́лимся о ми́лости, жи́зни, ми́ре, здра́вии, спасе́нии, посеще́нии, проще́нии и оставле́нии грехо́в рабо́в Бо́жиих, бра́тии свята́го хра́ма сего́ (а́ще во оби́тели: святы́я оби́тели сея́).

Го́споди, поми́луй. (три́жды)

Еще́ мо́лимся о плодонося́щих и доброде́ющих во святе́м и всечестне́м хра́ме сем, тружда́ющихся, пою́щих и предстоя́щих лю́дех, ожида́ющих от Тебе́ вели́кия и бога́тыя ми́лости.

Го́споди, поми́луй. (три́жды)

Свяще́нник: Я́ко ми́лостив и человеколю́бец Бо́г еси́, и Тебе́ сла́ву возсыла́ем, Ѻтцу́, и Сы́ну, и Свято́му Ду́ху, ны́не и при́сно, и во ве́ки веко́в.

Ами́нь.

(Часослов. 2002. С. 159)

Предстоя́тель, или́ учине́нный чтец (на пра́ктике пое́т хор):

Сподо́би, Го́споди, в ве́чер сей без грѣха́ сохрани́тися нам. / Благослове́н еси́, Го́споди Бо́же оте́ц на́ших, / и хва́льно и просла́влено и́мя Твое́ во вѣ́ки. Ами́нь.
Бу́ди, Го́споди, ми́лость Твоя́ на нас, я́коже упова́хом на Тя́. / Благослове́н еси́, Го́споди, научи́ мя́ оправда́нiем Твои́м. / Благослове́н еси́, Влады́ко, вразуми́ мя́ оправда́нiем Твои́м. / Благослове́н еси́, Святы́й, просвѣти́ мя́ оправда́нiи Твои́ми.
Го́споди, ми́лость Твоя́ во вѣк, дѣл руку́ Твое́ю не пре́зри. / Тебѣ̀ подоба́ет хвала́, / Тебѣ̀ подоба́ет пѣ́нiе, / Тебѣ̀ сла́ва подоба́ет, / Ѻтцу́, и Сы́ну, и Свято́му Ду́ху, / ны́нѣ и при́сно, и во вѣ́ки вѣко́в. Ами́нь.

(Служебник. 2003. С. 32)

Дiа́кон: Испо́лним вече́рнюю моли́тву на́шу Го́сподеви.

Хор: Го́споди, поми́луй.

Заступи́, спаси́, поми́луй и сохрани́ нас, Бо́же, Твое́ю благода́тiю.

Го́споди, поми́луй.

Ве́чера всего́ соверше́нна, свя́та, ми́рна и безгре́шна у Го́спода про́сим.

Пода́й, Го́споди.

А́нгела ми́рна, ве́рна наста́вника, храни́теля душ и теле́с на́ших у Го́спода про́сим.

Пода́й, Го́споди.

Проще́нiя и оставле́нiя грехо́в и прегреше́нiй на́ших у Го́спода про́сим.

Пода́й, Го́споди.

До́брых и поле́зных душа́м нашим, и ми́ра мíрови у Го́спода про́сим.

Пода́й, Го́споди.

Про́чее вре́мя живота́ на́шего в ми́ре и покая́нiи сконча́ти у Го́спода про́сим.

Пода́й, Го́споди.

Христиа́нскiя кончи́ны живота́ на́шего, безболе́знены, непосты́дны, ми́рны и до́браго отве́та на стра́шнем суди́щи Христо́ве про́сим.

Пода́й, Го́споди.

Пресвяту́ю, пречи́стую, преблагослове́нную, сла́вную Влады́чицу на́шу Богоро́дицу и Приснодѣ́ву Марíю со все́ми святы́ми помяну́вше, са́ми себе́, и дру́г дру́га, и ве́сь живо́т на́ш Христу́ Бо́гу предади́м.

Тебе́, Го́споди.

Свяще́нник: Я́ко благ и человеколю́бец Бог еси́, и Тебѣ̀ сла́ву возсыла́ем, Ѻтцу́, и Сы́ну, и Свято́му Ду́ху, ны́не и при́сно, и во ве́ки веко́в.

Ами́нь.

Ми́р все́м.

И ду́хови твоему́.

Дiа́кон: Главы́ на́ша Го́сподеви прикло́ним.

Тебе́, Го́споди.

Моли́тва главоприклоне́ния:

Свяще́нник: Го́споди Бо́же наш, приклони́вый небеса́ и соше́дый на спасе́ние ро́да челове́ческаго, при́зри на рабы́ Твоя́ и на достоя́ние Твое́. Тебе́ бо стра́шному и человеколю́бцу судии́, Твои́ раби́ подклони́ша главы́, своя́ же покори́ша вы́я, не от челове́к ожида́юще по́мощи, но Твоея́ ожида́юще ми́лости и Твоего́ ча́юще спасе́ния, я́же сохрани́ на вся́кое вре́мя и по настоя́щем ве́чере, и в приходя́щую но́щь, от вся́каго врага́, от вся́каго проти́внаго де́йства диа́вольскаго и от помышле́ний су́етных, и воспомина́ний лука́вых.

Та́же возглаша́ет свяще́нник:

Бу́ди держа́ва Ца́рствия Твоего́ благослове́на и препросла́влена, Ѻтца́, и Сы́на, и Свята́го Ду́ха, ны́не и при́сно, и во ве́ки веко́в.

Ами́нь.

Стихи́ра хра́ма Предте́чи:

*****************************************

Сла́ва, и ны́нѣ, Трiо́ди (Креста́), гла́съ 5‑й: (Трiодь постная. Ч. 1. 2002. Л. 225 об.)

Сла́ва Отцу́, и Сы́ну, и свято́му Ду́ху, и ны́нѣ, и при́сно, и во вѣ́ки вѣко́въ. Ами́нь.

Зря́щи тя́ тва́рь вся́ на Крестѣ́ на́га ви́сяща, содѣ́теля и зижди́теля всѣ́х, измѣня́шеся стра́хом, и рыда́ше: со́лнце же свѣ́т омрачи́, и земля́ колеба́шеся, ка́менiе же разсѣда́шеся, и хра́ма свѣ́тлость раздира́шеся. ме́ртвiи воста́ша от гробо́в, и а́нгельскiя си́лы ужасо́шася, глаго́люще: о чудесе́! судiя́ су́дится, и стра́ждет хотя́ за спасе́нiе мíра, и обновле́нiе.

(Служебник. 2003. С. 35)

Дiа́кон:

Спаси́, Бо́же, лю́ди Твоя́ и благослови́ достоя́ние Твое́, посети́ мiр Твой ми́лостию и щедро́тами, возвы́си рог христиа́н правосла́вных и низпосли́ на ны ми́лости Твоя́ бога́тыя, моли́твами всепречи́стыя Влады́чицы на́шея Богоро́дицы и Приснодѣ́вы Мари́и, си́лою Честна́го и Животворя́щаго Креста́, предста́тельствы честны́х Небе́сных Си́л безпло́тных, честна́го, сла́внаго проро́ка, Предте́чи и Крести́теля Иоа́нна, святы́х сла́вных и всехва́льных Апо́стол, и́же во святы́х оте́ц на́ших и вселе́нских вели́ких учи́телей и святи́телей, Васи́лия Вели́каго, Григо́рия Богосло́ва и Иоа́нна Златоу́стаго, и́же во святы́х отца́ на́шего Никола́я, архиепи́скопа Мирлики́йскаго, чудотво́рца, святы́х равноапо́стольных Мефо́дия и Кири́лла, учи́телей слове́нских, святы́х равноапо́стольных вели́каго кня́зя Влади́мира и вели́кия княги́ни О́льги, и́же во святы́х оте́ц на́ших всея́ Росси́и чудотво́рцев, Михаи́ла, Петра́, Алекси́я, Ио́ны, Фили́ппа и Ермоге́на, святы́х, сла́вных и добропобе́дных му́чеников, преподо́бных и богоно́сных оте́ц на́ших, святы́х и пра́ведных богооте́ц Иоаки́ма и А́нны и святаго имярек, егоже есть храм и егоже есть день, и всех святы́х. Мо́лим Тя́, многоми́лостиве Го́споди, услы́ши нас, гре́шных, моля́щихся Тебе́, и поми́луй нас.

Хор:

Го́споди, поми́луй. (40)

Еще́ мо́лимся о Богохрани́мей стране́ на́шей, благочести́вых лю́дех и власте́х ея́, о держа́ве, побе́де, пребыва́нии, ми́ре, здра́вии, спасе́нии их, и Го́споду Бо́гу на́шему наипа́че поспеши́ти и пособи́ти во всех и покори́ти под но́зе их вся́каго врага́ и супоста́та.

Го́споди, поми́луй. (30)

Еще́ мо́лимся о Вели́ком Господи́не и отце́ на́шем Святе́йшем Патриа́рсе Кирíлле, и о господи́не на́шем высокопреѡсвяще́ннѣйшем митрополи́те [или́ архїепи́скопѣ, или́ преѡсвяще́ннѣйшемъ епи́скопѣ] и́мярек, (аще же во обители: и о архимандри́те, или игу́мене на́шем имярек) и о всем во Христе́ бра́тстве на́шем, и о вся́кой души́ христиа́нстей, скорбя́щей же и озло́бленней, ми́лости Бо́жия и по́мощи тре́бующей; о покрове́нии гра́да сего́, и живу́щих в нем (или ве́си сея́ и живу́щих в ней, или святы́я оби́тели сея́ и живу́щих в ней); о ми́ре, и состоя́нии всего́ мiра; о благостоя́нии святы́х Бо́жиих церкве́й; о спасе́нии и по́мощи со тща́нием и стра́хом Бо́жиим тружда́ющихся и служа́щих оте́ц и бра́тий на́ших; о оста́вльшихся и во отше́ствии су́щих; о исцеле́нии в не́мощех лежа́щих; о успе́нии, осла́бе, блаже́нней па́мяти и о оставле́нии грехо́в всех преждеотше́дших оте́ц и бра́тий на́ших, зде лежа́щих и повсю́ду правосла́вных; о избавле́нии плене́нных, и о бра́тиях на́ших во слу́жбах су́щих, и о всех служа́щих и служи́вших во святе́м хра́ме сем (аще же во обители: во святе́й оби́тели сей) рцем.

Го́споди, поми́луй. (50)

Еще́ мо́лимся о е́же сохрани́тися гра́ду сему́ (или ве́си сей), и свято́му хра́му сему́ (аще же во обители: святе́й оби́тели сей), и вся́кому гра́ду и стране́, от гла́да, губи́тельства, тру́са, пото́па, огня́, меча́, наше́ствия иноплеме́нников и междоусо́бныя бра́ни; о е́же ми́лостиву и благоуве́тливу бы́ти благо́му и человеколюби́вому Бо́гу на́шему, отврати́ти вся́кий гнев на ны дви́жимый, и изба́вити ны от належа́щаго и пра́веднаго Своего́ преще́ния и поми́ловати ны́.

Го́споди, поми́луй. (три́жды)

Еще́ мо́лимся и о е́же услы́шати Го́споду Бо́гу глас моле́ния нас, гре́шных, и поми́ловати нас.

Го́споди, поми́луй. (три́жды)

Свяще́нник:

Услы́ши ны, Бо́же, Спа́сителю наш, упова́ние всех конце́в земли́ и су́щих в мо́ри дале́че, и ми́лостив, ми́лостив бу́ди, Влады́ко, о гресе́х на́ших, и поми́луй ны. Ми́лостив бо и человеколю́бец Бог еси́, и Тебе́ сла́ву возсыла́ем, Ѻтцу́, и Сы́ну, и Свято́му Ду́ху, ны́не и при́сно, и во ве́ки веко́в.

Ами́нь.

Ми́р все́м.

И ду́хови твоему́.

Дiа́кон:

Главы́ на́ша Го́сподеви прикло́ним.

Тебе́, Го́споди.

Свяще́нник:

Влады́ко многоми́лостиве, Го́споди Иису́се Христе́, Бо́же наш, моли́твами всепречи́стыя Влады́чицы на́шея Богоро́дицы и Приснодѣ́вы Мари́и, си́лою Честна́го и Животворя́щаго Креста́, предста́тельствы честны́х Небе́сных Си́л безпло́тных, честна́го, сла́внаго проро́ка, Предте́чи и Крести́теля Иоа́нна, святы́х сла́вных и всехва́льных Апо́стол, святы́х сла́вных и добропобе́дных му́чеников, преподо́бных и богоно́сных оте́ц на́ших, и́же во святы́х оте́ц на́ших и вселе́нских вели́ких учи́телей и святи́телей: Васи́лия Вели́каго, Григо́рия Богосло́ва и Иоа́нна Златоу́стаго, и́же во святы́х отца́ на́шего Никола́я, архиепи́скопа Мирлики́йскаго, чудотво́рца, святы́х равноапо́стольных Мефо́дия и Кири́лла, учи́телей слове́нских, святы́х равноапо́стольных вели́каго кня́зя Влади́мира и вели́кия княги́ни О́льги, и́же во святы́х оте́ц на́ших всея́ Росси́и чудотво́рцев, Михаи́ла, Петра́, Алекси́я, Ио́ны и Фили́ппа и Ермоге́на, и святы́х и пра́ведных богооте́ц Иоаки́ма и А́нны, (и святаго имярек, егоже есть храм, и егоже есть день) и всех святы́х Твои́х, благоприя́тну сотвори́ моли́тву на́шу, да́руй нам оставле́ние прегреше́ний на́ших, покры́й нас кро́вом крилу́ Твое́ю, отжени́ от нас вся́каго врага́ и супоста́та, умири́ на́шу жизнь. Го́споди, поми́луй нас и мiр Твой, и спаси́ ду́ши на́ша, я́ко благ и человеколю́бец.

Хор:

Ами́нь.

Воскре́сны, гла́съ 7‑й: (Октоих, гласы 5–8. 1981. С. 319)

Воскpе́сл еси́ из гpо́ба Спа́се мípа.

Воскpе́сл еси́ из гpо́ба Спа́се ми́pа, / и совоздви́гл еси́ челове́ки с пло́тию Твое́ю: // Го́споди, сла́ва Тебе́.

И́ны по алфави́ту, гла́съ 7‑й: (Октоих, гласы 5–8. 1981. С. 319)

Стíхъ: Госпо́дь воцари́ся, / в ле́поту облече́ся.

Воскpе́сшему из ме́pтвых, и пpосвети́вшему вся, / пpииди́те поклони́мся: / от а́дова бо мучи́тельства нас свободи́л есть, / Свои́м тpидне́вным Воскpесе́нием живо́т нам даpовавый, // и ве́лию ми́лость.

Стíхъ: И́бо утверди́ вселе́нную, / я́же не подви́жется.

Во ад соше́д Хpисте́, смеpть плени́л еси́, / и тpидне́вен воскpе́с, нас совоскpеси́л еси́, / сла́вящих Твое́ всеси́льное воста́ние, // Го́споди Человеколю́бче.

Стíхъ: До́му Твоему́ подоба́ет святы́ня, Го́споди, / в долготу́ дний.

Стpа́шен яви́лся еси́ Го́споди, во гpо́бе лежа́ я́ко спя, / воскpе́с же тpидне́вен я́ко си́лен, / Ада́ма совоскpеси́л еси́ зову́ща: / сла́ва Воскpесе́нию Твоему́, // Еди́не Человеколю́бче.

Сла́ва, и ны́нѣ, Трiо́ди (Креста́), гла́съ 4‑й: (Трiодь постная. Ч. 1. 2002. Л. 225 об.)

Сла́ва Отцу́, и Сы́ну, и свято́му Ду́ху, и ны́нѣ, и при́сно, и во вѣ́ки вѣко́въ. Ами́нь.

Пособи́вый Го́споди кро́ткому Дави́ду побѣди́ти иноплеме́нника, вѣ́рным лю́дем на́шим спобо́рствуй, и ору́жiем Креста́ низложи́ враги́ на́шѧ: покажи́ благоутро́бне на на́с дре́внiя ми́лости твоя́, и да разумѣ́ют вои́стинну, я́ко ты́ еси́ Бог: и на тя́ надѣ́ющiися побѣжда́ем, моля́щiися обы́чно пречи́стѣй твое́й Ма́тери, дарова́тися на́м вели́цѣй ми́лости.

(Часослов. 2002. С. 161)

Моли́тва свята́гѡ Сѷмеѡ́на Богопрїи́мца:

Ны́нѣ отпуща́еши раба́ Твоего́, Влады́ко, по глаго́лу Твоему́, с ми́ром: я́ко ви́дѣста о́чи мои́ спасе́нiе Твое́, е́же еси́ угото́вал пред лице́м всѣх люде́й, свѣт во открове́нiе язы́ков, и сла́ву люде́й Твои́х iзра́иля.

Свѧты́й Бо́же, Свѧты́й Крѣ́пкїй, Свѧты́й Безсме́ртный, поми́луй на́съ. (три́жды, с покло́ны)

Сла́ва Ѻтцу́, и Сы́ну, и Свѧто́му Ду́ху, и ны́нѣ и при́снѡ, и во вѣ́ки вѣкѡ́въ. Ами́нь.

Пресвѧта́ѧ Тро́ице, поми́луй насъ; Го́споди, очи́сти грѣхи́ на́шѧ; Влады́ко, прости́ беззако́нiя на́шѧ; Свѧты́й, посѣти́ и исцѣли́ не́мощи на́шѧ, и́мене Твоего́ ра́ди.

Го́споди, поми́луй. (три́жды)

Сла́ва Ѻтцу́, и Сы́ну, и Свѧто́му Ду́ху, и ны́нѣ и при́снѡ, и во вѣ́ки вѣкѡ́въ. Ами́нь.

Ѻ́тче нашъ, И́же еси́ на Небесѣ́хъ, да свѧти́тся и́мя Твое́, да прiи́детъ Ца́рствiе Твое́, да бу́детъ во́ля Твоя́, я́ко на небеси́, и на земли́. Хлѣбъ нашъ насу́щный да́ждь намъ днесь, и ѡста́ви намъ до́лги на́шѧ, я́коже и мы́ ѡставля́емъ должникѡ́мъ на́шымъ; и не введи́ насъ во искуше́нiе, но изба́ви насъ отъ лука́ваго.

Возгла́съ: Я́кѡ Твое́ есть Ца́рство, и си́ла, и сла́ва, Ѻтца́, и Сы́на, и Свѧта́го Ду́ха, ны́нѣ и҆ при́снѡ, и҆ во вѣ́ки вѣкѡ́въ.

Ами́нь.

Отпусти́тельный тропа́рь Богоро́дицы, гла́съ 4‑й: (Часослов. 2002. С. 162)

Богоро́дице Дѣ́во, ра́дуйся, / благода́тная Мари́е, Госпо́дь с Тобо́ю: / благослове́на Ты в жена́х, / и благослове́н Плод чре́ва Твоего́, // я́ко Спа́са родила́ еси́ душ на́ших. (два́жды)

Трiо́ди (Креста́), гла́съ 1‑й: (Трiодь постная. Ч. 1. 2002. Л. 224 об.)

Спаси́ Го́споди лю́ди твоя́, и благослови́ достоя́нiе твое́, побѣ́ды правосла́вным христiа́ном на сопроти́вныя да́руя, и твое́ сохраня́я Кресто́м твои́м жи́тельство.

Предлагаются же на уготованном столе ради благословения пять хлебов, пшеница, и два сосуда на сие устроенныя: един исполнен вина от плода лознаго, другий же елея. Диакон же кадит окрест стола, и иерея. Иерей же, взем един хлеб, знаменует им прочия хлебы и глаголет молитву сию велегласно [Егда же глаголет: Сам благослови́, тогда десницею указует на предложенныя хлебы, пшеницу, вино и елей]: (Служебник. 2003. С. 41)

Дiа́кон: Го́споду помо́лимся.

Хор: Го́споди, поми́луй.

Свяще́нник: Го́споди Иису́се Христе́, Бо́же наш, благослови́вый пять хле́бов и пять ты́сящ насы́тивый, Сам благослови́ и хле́бы сия, пшени́цу, вино́ и еле́й, и умно́жи сия́ во гра́де сем (или в ве́си сей, или во святе́й оби́тели сей), и во всем ми́ре твое́м, и вкуша́ющия от ни́х верныя освяти́. Я́ко Ты еси́ благословля́яй и освяща́яй вся́ческая, Христе́ Бо́же наш, и Тебе́ сла́ву возсыла́ем, со безнача́льным Твои́м Отце́м, и всесвяты́м, и благи́м, и животворя́щим Твои́м Ду́хом, ны́не и при́сно, и во ве́ки веко́в.

Ами́нь

Ѱало́мъ 33
(Часослов. 2002. С. 125)

Бу́ди и́мя Госпо́дне благослове́но от ны́не и до ве́ка. (три́жды)

Благословлю́ Го́спода на вся́кое вре́мя, / вы́ну хвала́ Его́ во усте́х мои́х.  О Го́споде похва́лится душа́ моя́, / да услы́шат кро́тцыи и возвеселя́тся. Возвели́чите Го́спода со мно́ю / и вознесе́м и́мя Его́ вку́пе. Взыска́х Го́спода и услы́ша мя́, / и от всех скорбе́й мои́х изба́ви мя́. Приступи́те к Нему́ и просвети́теся, / и ли́ца ва́ша не постыдя́тся. Сей ни́щий воззва́, и Госпо́дь услы́ша и́, / и от всех скорбе́й eго́ спасе́ и́. Ополчи́тся А́нгел Госпо́день о́крест боя́щихся Его́, / и изба́вит и́х. Вкуси́те и ви́дите, я́ко бла́г Госпо́дь; / блаже́н му́ж, и́же упова́ет На́нь. Бо́йтеся Го́спода, вси́ святи́и Его́, / я́ко не́сть лише́ния боя́щымся Его́. Бога́тии обнища́ша и взалка́ша, / взыска́ющии же Го́спода // не лиша́тся вся́каго бла́га.

Священник: Благослове́ние Госпо́дне на ва́с, Того́ благода́тию и человеколю́бием, всегда́, ны́не и при́сно, и во ве́ки веко́в.

Ами́нь.